Mae Peredur Owen Griffiths o Blaid Cymru wedi galw am amddiffynfeydd stormydd mwy cadarn ar ôl i Trefynwy gael ei tharo'n wael gan lifogydd dros y penwythnos.
Daeth Storm Claudia â dinistr i'r dref dros nos ddydd Gwener wrth i'r Afon Monnow dorri ei glannau yn dilyn llif o law. Bu'n rhaid achub trigolion o'u cartrefi mewn cwch oherwydd lefelau dŵr yn codi a oedd hefyd yn gorlifo nifer o fusnesau yn y dref hanesyddol yn ystod oriau mân dydd Sadwrn.
Gorfodwyd y prif lwybr rheilffordd rhwng Casnewydd a Henffordd hefyd i gau ar ôl i ran o drac ger croesfan reilffordd ym Mhandy gael ei difrodi'n ddifrifol, gan adael gwagle dau fetr rhwng y trac crog. Mae disgwyl i atgyweiriadau redeg o leiaf tan ddydd Mawrth gyda gwasanaethau rheilffordd wedi'u hatal yn y cyfamser.
Dywedodd Peredur, sy'n cynrychioli'r rhanbarth ac yn llefarydd Plaid Cymru ar Drafnidiaeth: "Mae hyn yn hollol ddinistriol i dref Trefynwy a thrigolion lleol sydd wedi dioddef llifogydd. Fel y gwelsom mewn mannau eraill yn fy rhanbarth, gall llifogydd gymryd amser hir i bownsio'n ôl ohonynt.
"Mae'n galonogol gweld sut mae pobl yn Nhrefynwy wedi helpu i roi cyflenwadau hanfodol i drigolion a busnesau yr effeithir arnynt.
"Gall y digwyddiadau mawr hyn fod yn ofidus iawn ond maen nhw hefyd yn dod â'r gorau mewn pobl gyda haelioni, caredigrwydd a thosturi a ddangosir yn helaeth."
Ychwanegodd Peredur: "Mae'r llifogydd mawr hyn yn dod yn fwy a mwy cyffredin. Mae'n ymddangos bod yr hyn a ystyriwyd unwaith fel digwyddiad tywydd unwaith mewn oes yn digwydd bob blwyddyn. Mae hyn yn golygu bod yn rhaid meddwl o ddifrif ar amddiffynfeydd llifogydd presennol.
"Mae rhai ohonynt yn amlwg ddim yn ddigon cadarn ar gyfer yr argyfwng hinsawdd rydyn ni'n ei wynebu. Bydd cymryd camau angen symiau difrifol o fuddsoddiad ond bydd y gost hon fach i’w gymharu a’r gost o wneud dim.
"Bydd cau'r rheilffordd rhwng Casnewydd a Henffordd am sawl diwrnod tra bod gwaith atgyweirio brys yn cael ei gynnal yn gost enfawr i'r economi leol.
"Rwy'n gwybod o ymweld â Chanolfan Weithredu Rheilffyrdd Cymru yn gynharach eleni bod oedi i wasanaethau trafnidiaeth o ganlyniad i'n tywydd cynyddol eithafol yn dod yn fwy aml.
"Mae'n rhaid i ni ailasesu'r mesurau a'r amddiffynfeydd a adeiladwyd ar adeg pan oedd yr hinsawdd yn wahanol i'r hyn rydyn ni'n ei brofi rwan. Mae'r ffaith bod hyn wedi newid mewn cyfnod mor fyr yn frawychus ac mae'n rhaid iddo ein deffro."